સૂર શબ્દના પગરવ માંડ્યા, માંડી પ્રેમની વાતો,
ગુર્જર વાણીની સોડમ લઈ, હૈયે સ્વર હરખાતો.
ધબકાર, ધબકાર, સૂર શબ્દના સથવાર.

શબ્દની મીઠી આંટી ઘૂંટી, કાવ્ય પઠનની વાતો,
નિરાકારમાં હરદમ ભળતા નાદ સુગમ સંભળાતો,
ગીત, ગઝલ ને કાવ્યમાં તરબર, આપણો એક વિચાર,
ધબકાર, ધબકાર, સૂર શબ્દના સથવાર.

કોઈ કવિ છે, કોઈ ગાયિકા, સહુ કોઈ ગુર્જરી પ્રેમી,
કોઈ કલમથી બને રાધિકા, કોઈ રેલે સ્વર હેલી,
શબ્દ સૂર ને, આપે જાણે ઇશ્વર એક આકાર,
ધબકાર, ધબકાર, સૂર શબ્દના સથવાર…

-કાંક્ષિત મુનશી “શફક”

સ્વરાંકન - હાર્દિક પુરોહિત (ગાંધીનગર)